МАЙДЫР ХУРАЛЫ дээрге эң кол судур-ном номчуур хуралдарның бирээзи болурда, черже Майдыр бурганның (Будданың) амгы үеде делегейге кээп саадап-дүшкенинге тураскааткан хурал болуп турар. Махаянаның өөредии ёзугаар Майдыр Бурган дээрде Тушита дээр сарыг шажыңда азы болза буддизмде бурганнарның эң сөөлгү катап катап Будда кылдыр төрүттүнериниң бертинде манап, чурттаар, дээрде 6 ораннарның 4 дугаар ораны болур Тушитада чурттап, ында бурганнарга Дхарманы азы болза Өөредилгени берип, черже дүжүп, бадып кээр үезин манап турар.
Махаянаның ыдыктыг номнары азы болза сутралары (бо ыдыктыг номнарда Махаянаның өөредиин чыып бижээн) ёзугаар Будда Шакьямуни черге катап төрүттүнер мурнунда база-ла Тушита дээр дээрде оранга төрүттүнген турган. Сөөлгү катап кижилер аразынга төрүттүнер кылдыр шиитпирни хүлээп алгаш, дээрде Тушита деп орандан черже дүжүп кел чыткаш, Шакьямуни бодунуң короназын Майдыр (Майтрея) Бурганның (Будданың) бажынга салган. Ол дээрге-ле Дхарманың кажан-даа үзүк-соксаал чокка шимчеп, чоруп турарының демдээ-дир. Майтрея бо оранче Будда Шакьямуниниң өөредии суларап, кижилерниң  хилинчээ шыдажыр арга чок берге апаарга, а оларның назынының хуусаазы 10 хар апаарга, дүжүп кээр болгай. Ынчан улуг
Будда Майтрея катап база Будда Шакьямуни ышкаш Дөрт дээди алыс шыннарның (хилинчек дугайында шын; хилинчектиң тыптып кээр чылдагаанының дугайында шын; хилинчекти соксадыырының дугайында шын; хилинчекти соксадырын айыткан оруктуң дугайында шын) дугайында өөредилгезин белекке бээрге, кижилерниң назынының чурттаар хуусаазы 84000 чылга чедир өзүп кээр.
Майдыр Хуралы дээрге эң-не чараш, байырлыг байырлалдарның бирээзи болуп турар. Ол байырлалче Хүрээ-дуганнарже болза-даа хөй чон чыглып кээр. Ол хүн байырлыг номчулга соонда, Хүрээлерден Майтреяны үндүргеш, аъттың азы чаанның хевирлеринге кошкан дугуйларның кырынга шывыг чаткаш, олуртур. Оон шажынчылар долганган аът азы чаан хевирин кошкан дугуйлар Хүрээниң девискээрин оожум хүн шимчээшкининиң аайы-биле долганыр.