Бо хүн Тываның төөгүзүнде база бир онзагай болуушкун – Даа кожууннуң 260 чыл болганынга тураскааткан байырлалга барып кириштим. Тыва культураның, шажын-чүдүлгениң, эртемниң кавайы кылдыр санаттынып болур Даа кожуунга амгы Чөөн-Хемчик, Сүт-Хөл, Өвүр, Чаа-Хөл болгаш Улуг-Хем кожууннар кирип турган. Шак бо кожууннуң чонунуң Тываның хөгжүлдезинге киирген үлүг-хуузу канчаар-даа аажок улуг. Даа кожуундан алдан-маадыр өгбелеривис, эрес-дидим тыва эки турачылар, тускай шериг операциязында Төрээн чурту дээш демиселде коргуш чок киржип турар оолдарывыс, мерген угаанныг эртемденнер, тайбың иштиң маадырлары, ус-шевер, салым-чаяанныг кижилер арбын үнген. Онзагай байырлал-биле чаңгыс чер чурттугларымга байырым чедирип, төрээн Тывазының хөгжүлдезинге улуг үлүг-хуузун киирген кожууннуң чурттакчыларынга бедик шаңналдарны чонувустуң мурнундан тывыстым.