Бөгүн «Сүбедей» спорт өргээзинге бүгү-российжи ажылчын олуттар ярмарказының федералдыг чадазы болуп эрткен.
Күш-ажыл ярмарказынга «Эльбрусметалл-Литий», «Лунсин», «Межегей хөмүр-даш» кызыгаарлаан харыысалгалыг ниитилелдер, Россияның Айыыл чок чорук албанының Тыва Республикада кызыгаар эргелели, Росгвардияның Тыва Республика талазы-биле эргелели, «Росчетки Сибирь Тываэнерго» акционерлиг ниитилел, Россия почтазының Тыва Республика эргелели болгаш аңгы-аңгы регионалдыг яамылар болгаш оларның чагыргазында албан черлери дээш (культура, спорт, саң-хөө, чурагайлыг хөгжүлде болгаш өске-даа), 40 ажыг ажыл берикчизи хостуг олуттарны саналдап, ажык шилилдени чоруткан.
ТР-ниң Чазак Даргазының оралакчызы Орлан Сарыглар ажылчын олуттар ярмарказы чонну ажылга хаара тударынга база кижи бүрүзүнүң профессионал сайзыралынга таарымчалыг байдалдарны тургузарының талазы-биле күрүнениң ээлчеглиг базымы-дыр дээрзин демдеглээн. Оралакчы дарга тускай шериг операциязының киржикчилерин болгаш оларның өг-бүлезиниң кежигүннерин, аныяктарны, кадыкшылының байдалы-биле харык-шинээ кызыгаарлыг улусту, бир дугаар ажыл дилеп келгеннерни ажылга хаара тударынче онза кичээнгейни салганын айыткан.
Хемчегге «Россияның ажылы» кадрлар төвүнүң девискээрин, ажыл берикчилериниң, өөредилге болгаш мөөрей дээш алды аңгы шөлчүгешти организастан. «Россияда ажыл» кадрлар төвүнүң шөлү чонну ажылга хаара тудар деткимчениң шупту хемчеглерин сүмелеп, Тываның ажыл берикчилеринден 1000 ажыг хостуг олутту таныштырган. Красноярск крайдан, Калуга база Кемерово областардан ажыл берикчилери база хостуг ажылчын олуттарын сүмелээн.
ТР-ниң күш-ажыл болгаш социал политика сайыды Эдуард Санданның дыңнатканы-биле алырга, регионда тудуг адыры идепкейлиг хөгжээни-биле холбаштыр, бүгү-российжи ажылчын олуттар ярмарказында улуг тудуг компаниялары киржип турар. Ажыл дилеп турар кижилер «Восток» кызыгаарлаан харыысалгалыг ниитилел, «Регионтудуг», «Күртудугчагыг» дээш, оон-даа өске организациялардан ажылды тып алыр аргалыг болган.
Тускай шериг операциязының киржикчилерин болгаш оларның өг-бүлезиниң кежигүннерин ажылга хаара тударынче онза кичээнгейни салган. Тываның Баштыңы Владислав Ховалыгның даалгазы езугаар ТР-ниң Чонну ажылга хаара тудар төвү бо угланыышкында идепкейлиг ажылдап, ук бөлүктүң хамаатыларын өөредир, ажылга хаара тудар, деткиир болгаш дуза чедирериниң ниити хемчеглерин боттандырып турар. Оларның хөй кезии боттарының ажыл-херээн ажыдарынга деткимчени алган.
Апрель айда Тывага эрткен ярмарканың регионалдыг чадазынга 7876 кижи, ооң иштинде 4107 ажыл чок кижилер болгаш муң ажыг доозукчу киришкенин сагындыраал. Ярмарка хүнүнде дорт чугаалажыышкыннарның түңнелинде, 563 кижиге ажылдарны саналдаан, дараазында неделя дургузунда 308 кижи ажылга тургустунган.
Ажыл-биле бот-хандырттынган сайгарлыкчылар продукциязын делгеп, садып-сайгарган.
«Тывамедиагрупп» медээлер агентилелиниң чуруктары
https://tmgnews.ru/novosti/d-rten-azhyg-azhyl-berikchizi-azhyk-shilildeni-chorutkan/
Теги:
болгаш, ажыл, ажылга, хаара, ажылчын, олуттар, Тыва, эргелели, оларның, дээш, ажыг, хостуг, база, кижи, тудар, турар, спорт, бүгүроссийжи, кызыгаарлаан, харыысалгалыг, Россияның, чок, Республика, талазыбиле, ниитилел, регионалдыг, чонну, шериг, операциязы
Количество показов:
4